Instituti Robert Koch thotë se qasja tani është të “mësohemi të jetojmë me virusin dhe ta kontrollojmë atë”.
Gjermania do të duhet të mësojë të jetojë me koronavirusin, duke ndërtuar taktika të tilla si distanca fizike dhe higjena e rreptë në jetën normale të përditshme, ka thënë institucioni kryesor i shëndetit publik i vendit, ndërsa ka rralluar konferencat e rregullta për pandeminë si rezultat i rënies së vazhdueshme të rasteve të reja.
Lars Schaade, nënkryetari i Institutit Robert Koch, tha se ndërsa shkalla e infeksionit në Gjermani kishte “rënë në mënyrë të konsiderueshme”, vendimi për të rralluar konferencat e tyre – të cilat kanë tërhequr miliona shikues që prej fillimit në shkurt, së pari çdo ditë dhe më vonë dy herë në javë – shënoi një “fazë të re”.
“Epidemia nuk ka përfunduar,” tha ai. “Por, pasi e kemi larguar në mënyrë të konsiderueshme virusin në mënyrë që numri i rasteve të reja të jetë midis 600 dhe 1.300 në ditë … qasja jonë tani duhet të jetë të mësojmë të jetojmë me virusin dhe ta kontrollojmë atë.”
Gazetarët që morën pjesë në konferencë u shprehën kundër ndërprerjes së konferencave. Ato i kanë ofruar publikut dhe mediave informacione të hollësishme mbi shkallët e infeksionit të Gjermanisë, informacione të azhurnuara mbi zhvillimin e virusit dhe shpjegime mbi masat parandaluese, dhe shkencën që qëndron në vendimet e shëndetit publik, pa asnjë ndikim politik.
Schaade tha që media mund të vazhdojë të shtronte pyetje në departamentin e shtypit të institutit dhe do të kishte konferenca për shtyp në rast të zhvillimeve të rëndësishme.
Gjermania ka pasur 166.091 raste të konfirmuara të koronavirusit nga e enjtja, sipas shifrave të regjistruara në RKI, një rritje prej 1.284 që nga e mërkura. Kishte shqetësime se numri i rasteve të reja po rritej, por Schaade këmbënguli se ato reflektonin zhvillim normal në baza javore, me numër më të lartë të regjistruar shpesh të mërkurën dhe të enjten.
Riprodhimi i vendit ose shkalla e R ka rënë në 0.65, që do të thotë se mesatarisht çdo 10 të infektuar infektojnë midis gjashtë dhe shtatë të tjerë.
Schaade tha që ai priste që pandemia të zgjasë për shumë muaj të tjerë, dhe me shumë gjasa vitin e ardhshëm. “Është e qartë se ky virus nuk mund të zhduket në Gjermani. Ka konsensus për këtë – të paktën derisa të ketë një vaksinë ose një trajtim. Do të duhet të përpiqemi ta adaptojmë këtë virus në jetën tonë të përditshme, duke ndryshuar sjelljen tonë për të zvogëluar bartjen e tij. Ne e gjejmë veten në një normalitet të ri. “
Ai tha se trajtimi i virusit kërkonte që secili person të merrte përgjegjësinë për sjelljen e tij / saj. “Vetëm kështu mund ta kontrollojmë virusin dhe të bëjmë një jetë të përshtatshme si shoqëri.”
Të mërkurën, drejtuesit e 16 shteteve të Gjermanisë ranë dakord të vendosnin vëmendjen e autoriteteve rajonale të shëndetit publik për të monitoruar përparimin e virusit dhe të nxisin masa urgjente nëse infeksionet fillojnë të rriten. Nëse shkalla e infeksioneve të reja në një komunë tejkalon 50 për 100,000 banorë brenda shtatë ditëve, komunitetet do të detyrohen shpejt të mbyllen, duke përfshirë mbylljen e shkollave dhe dyqaneve. Schaade e quajti këtë masë si “kufi pragmatik të sigurisë”.
Ka një nervozizëm të konsiderueshëm në Gjermani për vendimet që lejojnë të hapen të gjitha dyqanet dhe shkollat. Angela Merkel e quajti vendimin për të dalë nga bllokimi “i guximshëm”, duke theksuar rrezikun që Gjermania mund të humbasë shpejt avantazhin e fituar nga përhapja e virusit. “Ne duhet të jemi të kujdesshëm që situata të mos dalë jashtë kontrollit,” tha ajo të mërkurën.
Kancelarja është akuzuar nga disa parti politike se po vepron shumë vonë për të shpëtuar ekonominë, ndërsa disa virologë thonë se masat po largohen shumë shpejt. Efektet e zbutjes së masave priten të jenë të dukshme në shkallët e infeksionit rreth dy deri në tre javë pas zbatimit të tyre.
Schaade tha që testimi dhe gjurmimi mbeten thelbësore për trajtimin e virusit. Edhe pse Gjermania ka mbajtur një kapacitet për të kryer 964,000 teste në javë, vetëm 317,000 teste janë kryer javën e kaluar. Schaade tha që kjo ishte një reflektim i faktit që numri i infeksioneve kishte rënë, por për shkak të mungesës globale të artikujve siç janë reagjentët “nuk është keq të kesh një kapacitet të caktuar rezervë” në pritje të një vale të dytë.
Tekstin origjinal e gjeni te “The Guardian”.
